Buna səbəb bazarda tələbin aşağı düşməsi və alıcılıq qabiliyyətinin azalmasıdır
Fevral ayında təkrar avtomobil bazarında əvvəlki aylardakı kimi passivlik qeydə alınıb. Passivliyin əsas səbəbi iqtisadi böhran nəticəsində bazarda tələbin aşağı düşməsi və alıcılıq qabiliyyətinin azalmasıdır.

Ay ərzində təklif üzrə 1,1% artım, tələb üzrə isə 4,6% azalma qeydə alınıb. Ay ərzində satış mərkəzlərinə müraciət edənlərin sayında da ötən ayla müqayisədə azalma qeydə alınıb ki, bu, bağlanan əqdlərin dinamikasının azalmasında da özünü göstərmişdir (6,7%).
Ay ərzində təkrar bazar üzrə orta qiymət 7,2% azalaraq 16240 ABŞ dollarına bərabər olub. 
Bazarda müşahidə olunan passivlik avtomobillərin ekspozisiya müddətinin artmasına da təsir göstərib. Ötən ay ekspozisiya müddəti daha 6 gün artaraq 85 günə çatıb. Buna müvafiq risk dərəcəsi artıb və əmlakın bu növü üzrə likvidlik dərəcəsi aşağı düşüb. Tədricən rəqabətə davam gətirə bilməyən xırda alverçilərin bazardan çıxması davam edir.
Fevral ayında təkrar avtomobil bazarında araşdırma predmeti olan 6580-dən artıq avtomobilin cəmi 31%-ə qədəri bazara məhz fevral ayı ərzində təklif olunub. Qalan 69%-i isə əvvəlki aylardan qalan avtomobillərdir.
Bazardakı yerdəyişmələr təkrar bazarda proqnozlaşdırılan qiymət artımının qarşısını alıb və dünyada baş verən maliyyə böhranının avtomobil istehsalçılarına mənfi təsiri fevralda qiymətlərin bir qədər də ucuzlaşmasına təsir göstərib. Ötən ay ilkin bazar üzrə orta qiymət azalması5,7% təşkil edib.