Maşın almaq istəyənlərin sayı bir qədər artıb
Mart ayında təkrar avtomobil bazarında nisbi aktivlik qeydə alınıb ki, ekspertlər bunu mövsümi amillərlə bağlayırlar. Ötən ay təklif üzrə artım 4,9% təşkil edib. Təklifin artması ilə yanaşı, tələb də cüzi artmışdır (1,2%).

Ay ərzində satış mərkəzlərinə müraciət edənlərin sayında da ötən ayla müqayisədə artım qeydə alınıb ki, bu bağlanan əqdlərin dinamikasının artmasına az da olsa, təsir göstərmişdir (2,7%).  Ay ərzində bazarda orta qiymət dəyişməz qalıb və 16240 ABŞ dollarına bərabər olub.
Bazarda müşahidə olunan nisbi aktivlik avtomobillərin ekspozisiya müddətinin artmasının qarşısını ala bilməyib. Mart ayında ekspozisiya müddəti daha 4 gün artaraq 89 günə catıb. Müvafiq olaraq risk dərəcəsi artıb və əmlakın bu növü üzrə likvidlik dərəcəsi isə aşağı düşüb.
Ay ərzində təkrar avtomobil bazarında araşdırma predmeti olan 6900-ə qədər avtomobilin cəmi 30%-i bazara məhz mart ayı ərzində təklif olunub. Qalan 70%-i isə əvvəlki aylardan qalan avtomobillərdir.
Bazardakı yerdəyişmələr təkrar bazarda proqnozlaşdırılan qiymət artımının qarşısını alıb və dünyada baş verən maliyyə böhranının avtomobil istehsalcılarına mənfi təsiri martda qiymətlərin bir qədər də ucuzlaşmasına təsir göstərib. Amma bu proses ölkəmizin ilkin avtomobil bazarında müşahidə olunmayıb. Bazarın bu seqmenti üzrə də qiymətlər stabil qalmışdır.
Təkrar bazara təqdim olunan avtomobillərin illər üzrə bölgüsündə ciddi dəyişiklik baş verməyib. Araşdırmalar göstərir ki, tədricən ili köhnə olan avtomobillərə maraq azalır. 1998-1999-cu illərin istehsalı olan avtomobillərin bazarda 1996-1997-ci illərin markalarını üstələmə tendensiyası davam edir. Bununla yanaşı, ili yeni olan avtomobillərə olan marağın artması təklifdə də ili yeni olan avtomobillərin coxalması ilə müşahidə olunur. Ekspertlər hesab edirlər ki, yaxın gələcəkdə bazarda üstünlük 2000-ci ildən bu yana istehsal olunmuş avtomobillərə kecəcək. Monitorinq qrupunun araşdırmaları 1990-2008-ci illəri əhatə edib.