Hər ay bazara yaşayış binaları daxil olsa da, alıcılıq qabiliyyəti zəifdir
“Əmlak Bazarı İştirakçıları” İctimai Birliyi monitorinq qrupu tərəfindən iyul ayında paytaxtın ilkin mənzil bazarında aparılan araşdırmalar zamanı məlum olubdur ki, ay ərzində daha yeni bir yaşayış binası bazara daxil olaraq satışa çıxarılmışdır.

Yasamal rayonu ərazisində “Mur-ay” MTK tərəfindən bünövrətökmə işlərinin aparıldığı bu yaşayış binasının 14 mərtəbəli, 3 bloklu olması nəzərdə tutulub. Son aylar ərzində ilkin bazara yeni yaşayış və digər ofis binalarının (“6-cı mərtəbə” şirkəti tərəfindən inşa edilən yeni biznes mərkəz və s.) daxil olması inşaat sektorunda dinamiklikdən xəbər versə də, alqı-satqı prosesinin zəif tendensiyası hələ də hökm sürməkdədir. Az sayda olan alqı-satqı əqdləri isə əsasən Yasamal və Xətai rayonlarında müsahidə olunub. Belə ki, iyul ayında tikinti şirkətlərinin sayı ötən ayda olduğu kimi 153 ədəd olaraq qalsa da, satışa çıxarılan binaların sayı 440-a qarşı 441 ədəd olub. Bazarda istər mövsümi, istərsə də alıclıq səviyyəsinin aşağı olması ilə müşahidə edilən bu passivlik qiymət azalmasına nisbətən təsir göstərmişdir.
Şəhər üzrə iyul ayı ərzində satış üçün təklif оlunmuş mənzillərin оrta qiyməti 0,4% aşağı düşərək, iyun ayındakı 870 manata qarşı 866 manat səviyyəsində qərarlaşıb. Ötən rübün müvafiq dövrü ilə müqayisədə qiymət azalması 1,6%, ötən illə müqayisədə 8,6%, bu ilin əvvəli ilə nisbətdə isə 3,5% təşkil edib.
Rayonlar üzrə inşa edilən yaşayış binalarının sayına görə ilk yerdə bazara yeni daxil olan bina da ərazisində yerləşən Yasamal rayonu tutur. Sonrakı yerləri isə Xətai və Nəsimi rayonları tuturlar.
Оrta qiymətə uyğun оlaraq qiymət indеksində 0,4% azalma ötən aydakı 333,4 bəndinə qarşı iyul ayında 333.0 bəndində qərarlaşıb.