Avqustda orta qiymətlərdə heç bir dəyişiklik qeydə alınmayıb
Bazarın ümumi xarakteristikası
2011-ci ilin avqust ayı ərzində “Əmlak Bazarı İştirakçıları” İctimai Birliyi tərəfindən paytaxtın ilkin mənzil bazarında növbəti monitorinq aparılıb. Ay ərzində satışa çıxarılan binaların sayı əvvəlki aydakı 432 ədədə qarşı 428 olub.

Əvvəlki aylardakı kimi nisbi canlanmanın müşahidə edilməsi, dövlət əhəmiyyətli layihələrin həyata keçirilməsi nəticəsində mənzilləri söküntüyə məruz qalmış sakinlərin yeni tikililərə köçürülməsi, inşası başa çatan yeni tikililərin sayının, kredit portfelinin həcminin artması avqust ayında da davam edib. Bünövrəsi qoyulan yeni tikililərin sayının məhdudlaşması ümumilikdə təklif portfelində də azalma ilə müşahidə olunub. Avqust ayında satışa çıxarılan yeni tikililərin sayında artım olmasa da, tikinti şirkətlərinin sayında azalma baş verib. İki tikinti şirkəti bazardan çıxdığından tikinti aparan şirkətlərin ümumi sayı ötən aydakı 155 ədədə qarşı 153 olub. 
1 kv.m sahənin qiyməti
“ƏBİ” İB tərəfindən ilkin mənzil bazarında aparılan qiymət monitorinqinin nəticələrinə görə, paytaxt üzrə avqust ayı ərzində satış üçün təklif оlunmuş mənzillərin оrta qiymətində heç bir dəyişiklik baş verməyib, orta qiymət əvvəlki  aydakı 1 kv. metr üzrə 837 manat səviyyəsində qərarlaşıb.
Qiymət fərqi ötən rübün müvafiq dövrü ilə müqayisədə 0,2 %, ötən illə 3,2%, 2011-ci ilin yanvar ayı ilə nisbətdə isə 1,3% azalma təşkil edib. 2008-ci ilin sentyabr ayı (böhran dövrü) ilə müqayisədə qiymət fərqi 29,9 azalma ilə qeydə alınıb.
Avqust ayında zonalar üzrə orta qiymətlərin dəyişməsi 1-ci zona üzrə 2132,8, 2-ci zonada 1218,4, 3-cü zonada 644,1, 4-cü zona üzrə isə 563,3 manat təşkil edib. 
Yasamal rayonu digər aylarda olduğu kimi inşa edilən yaşayış binalarının sayına görə (118 yeni tikili) ilk yerdədir, daha sonra isə Xətai (90 yeni tikili) və Nəsimi (74) rayonları gəlir.
Orta qiymətdə heç bir dəyişiklik qeydə alınmadığından ay ərzində qiymət indeksində də heç bir dəyişiklik baş verməyib. Avqust ayında bu göstərici sabit qalaraq 320.7 bəndində qərarlaşıb.
Tikintisi aparılan yеni binalarda оtaqlar üzrə pay bölgüsü
Avqust ayı ərzində ötən aylardakı kimi, yеni tikililərdə 3 оtaqlı mənzillər daha çох üstünlük təşkil еdib. 5 оtaqlı mənzillər əsasən şəhərin 1 zоnasındadır, 1 оtaqlı mənzillər isə daha çох 3-cü zоnanın payına düşür. Avqust ayında 1 otaqlı mənzillərin orta sahəsi 60,7 kv.m, 2 otaqlılarınkı 92,1 kv.m, 3 otaqlılarda 131,8 kv.m, 4 otaqlılarda 182,9, 5 otaqlılarda isə 238, 3 kv.metr təşkil edib.