Ötən ilin müvafiq dövrü ilə müqayisədə 35,9% qiymət azalması müşahidə olunub
2009-cu ilin fevral ayı ərzində Bakı şəhəri üzrə tikinti materialları bazarında 38 adda, 85 çeşiddə tikinti materiallarının qiyməti izlənilib. Araşdırılan məhsullar üzrə respublikamızda istehsal olunan malların ümimi istehsalda həcmi 51,8% təşkil edib.

 Dünyada baş verən maliyyə böhranı tikinti materiallarının qiymətlərindəki ucuzlaşmanı dərinləşdirməkdə davam edib. Daxili istehsalın artımı ilə qlobal maliyyə böhranının üst-üstə düşməsi idxal məhsullarının qiymətlərinin sürətlə aşağı enməsi tendensiyasını hələ də saxlayır. Metal və metal məmulatlarının qiymətində azalma davam etməkdədir.
Fevral ayında 85 adda məhsuldan 32-si üzrə qiymət azalması, 4-ü üzrə qiymət artımı, 49-u üzrə isə stabillik müşahidə edilib. Nəticədə ay ərzində bazarda formalaşan orta qiymətlərdə azalma ötən yanvar ayı ilə müqayisədə 3,3% təşkil edib.
Fevralda katinka 5,4%, şveller 9,5%, künyə 5,7%, dəmir təbəqə 9,7%, armatur 3,7%, şüşə 12,9%, taxta 2,5%, dikt 13,8%, şifer 9,5%, qum 2,7%, mismar 16,3%, boru 6,6%, DVP 1,8%, sink təbəqə 2,2%, lambirin 5,2%, izolyasiya 5,8%, alkopan 5,3%, penaplast 11,1%, üzlük daş 12% ucuzlaşıb. Laminat parket 6,5%, kafel-metlax yapışdırıcısı 1,2% bahalaşıb. Qalan tikinti materialları üzrə qiymətlər dəyişməz qalıb.
Aylıq nəticə isə belədir ki, ötən ilin müvafiq dövrü ilə müqayisədə 35,9% qiymət azalması müşahidə olunub. Qiymət indeksi isə ötən aya nisbətən 0,6% azalaraq, 103,8 səviyyəsində qərarlaşıb.