Bunun səbəbi yay mövsümünün başlamasıdır
May ayı ərzində torpaq bazarına təklif olunan ümumi 800,1 ha torpaq sahəsinin 77,6%-ni boş sahə, qalanını isə qeyri-yaşayış sahələri və köhnə yaşayış sahələri təşkil edib. Torpaq bazarında qiymət indeksi 3 bənd azalaraq 238.3 səviyyəsində qərarlaşıb.

Ötən aylarda olduğu kimi may ayında da Bakı şəhəri üzrə torpaq bazarında orta qiymətlərdə azalma müşahidə olunmuşdur. Ay ərzində bazara çıxarılan 1 sot torpağın orta qiyməti 1.1% azalaraq 14265 $/sot səviyyəsindən 14108$/sot səviyyəsinə enib.
Ay ərzində qiymət azalması bütün zonalarda qeydə alınmışdır. Bu, bütün zonalar üzrə torpağın bazar qiymətinin real dəyərindən baha olması ilə bağlıdır.
Şəhərin mərkəzində qiymətlərin həddən artıq yüksək olması, I və II zonalarda tələbin aşağı düşməsi ilə paralel qiymətlərin də azalmasına səbəb olub. Martdan fərqli olaraq maydə I zona üzrə qiymət azalması bir qədər stabilləşməyə doğru yönəlmişdir. Amma II, III və IV zonalarda təklifin çox olması, tikintinin tempinin aşağı enməsi nəticəsində torpağa olan tələbin sürətlə azalması bu zonalar üzrə qiymətlərin enmə tendensiyasını əvvəlki kimi saxlayır. III və IV zonalarda torpaq sahələrinin mülkiyyət hüquqlarına dair sənədlərində problemlərin hələ də qalması bu zonalar üzrə qiymət azalmasına daha ciddi təsir göstərir. Qiymətlərin hələ də real dəyərdən yüksək olması torpağın gəlirliyinə ciddi təsir göstərməsə də, bazarın bu seqmentində ekspozisiya müddətinin artmasına və likvidlik dərəcəsinin düşməsinə təsir göstərib. Bütün bunlarla yanaşı torpaq sahələrinin ipoteka prosesində girov predmeti kimi qəbul olunmaması daşınmaz əmlak subyekti kimi mülkiyyətin bu növünə olan marağı xeyli zəiflədib. Son aylar bazarda baş verən proseslər bazarın bu seqmenti ilə aparılan əməliyyatlarda risk dərəcəsini artırıb.
Mayda rayonlar üzrə ən çox qiymət azalması Səbail (-1.4%) rayonunda qeydə alınmışdır. Yay mövsümünün başlanması Əzizbəyov rayonu üzrə torpaq qiymətlərinin nisbi artımına (0,2%) səbəb olmuşdur.
Bütün bunlarla yanaşı, hazırda torpaq bazarında nisbətən aktiv rayonlar sırasına Binəqədi və Nizami rayonları başçılıq edirlər. Ən passiv rayon isə ötən aylar olduğu kimi Nəsimi rayonudur.
Ötən ay torpaq bazarına təklif olunan ən bahalı torpaq sahəsi 250000 $\sot Nəsimi (Kubinka) rayonunda, ən ucuz torpaq sahəsi isə 350 $\sot Abşeron (Pirəkəşkül qəsəbəsi) rayonunda qeydə alınmışdır.