Nisbətən aktiv rayonlar sırasına Suraxanı və Nərimanov rayonları başçılıq edirlər
Fevral ayı ərzində bazara təklif olunan torpaq sahələrinin əsasını ötən aylarda olduğu kimi boş torpaqlar təşkil edib. Ümumi 816,8 ha torpaq sahəsinin 76,7%-ni boş sahə, qalanını isə qeyri-yaşayış sahələri və köhnə yaşayış sahələri təşkil edib.

Torpaq bazarının şəhərətrafı və paytaxtdan kənar ərazilərə doğru genişlənməsi tendensiyası fevral ayında nisbətən zəif davam edib. Ay ərzində torpaq üzərində bağlanan alqı-satqı əqdlərinin sayında müvafiq olaraq azalma müşahidə olunub və bazarın aktivliyi əvvəlki aya nisbətən mənfiyə doğru dəyişib. Bazarın digər seqmentlərində olduğu kimi, torpaq bazarında da formalaşan passiv tendensiya əsasən iqtisadi böhranın təsiri ilə bağlı olmuşdur.
Əvvəlki ayda olduğu kimi, fevral ayında da Bakı şəhəri üzrə torpaq bazarında orta qiymətlərdə azalma müşahidə olunmuşdur. Ay ərzində bazara çıxarılan 1 sot torpağın orta qiyməti 3,4% azalaraq 23121 $/sot səviyyəsindən 22341 $/sot-a enib. Ay ərzində heç bir rayon üzrə qiymət artımı qeydə alınmayıb. Ən çox qiymət azalması isə Səbail (-3,9%) rayonunda baş verib.
Ay ərzində şəhər ətrafı və şəhərdən kənar rayonlarda torpaq üzərində aparılan əməliyyatlar şəhərin mərkəzinə nisbətən çox olmasına baxmayaraq, qiymət azalması da daha çox məhz III və IV zonalarda qeydə alınmışdır. Başqa cür desək, III və IV zonalarda qiymətin azalması bu əraziləridə torpağa marağı nisbətən artırıb.
Şəhərin mərkəzində qiymətlərin həddən artıq yüksək olması I və II zonalarda tələbin aşağı düşməsinə və paralel olaraq qiymətlərin azalmasına səbəb olub. III və IV zonalarda isə qiymətin ucuzlaşmasına təklifin çox olması, tikintinin tempinin aşağı enməsi və nəticədə torpağa olan tələbin sürətlə azalması səbəb olub.
Bütün bunlarla yanaşı, hazırda torpaq bazarında nisbətən aktiv rayonlar sırasına Suraxanı və Nərimanov rayonları başçılıq edirlər. Ən passiv rayon isə ötən aylar olduğu kimi Nəsimi rayonudur.
Ay ərzində bazara təklif olunan ən bahalı torpaq sahəsi Nərimanov (Atatürk prospekti) rayonunda (320000 min $/sot), ən ucuz torpaq sahəsi isə Sabunçu (Ləiş qəsəbəsi) rayonunda (350 $/sot) qeydə alınıb.